Our Story

መጽሐፈ ሰዋሰው ወ ግስ ወ መዝገበ ቃላት ሐዲስ “ጊዜ” የሚለውን ቃል “በቁሙ የተለየ፣ የተወሰነ ሰዓት፣ ዕለት፣ ወርኅ፣ ዓመት፣ ዘመን፣ ዕድሜ ሰው እስኪሞት እስኪሻር የሚኖርበት፣ የሚያርፍበት፣ የሚሰራበት ሌትና መዓልት…” ሲል ይተረጉመዋል፡፡

የአዲስ አበባ ዩኒቨርሲቲ የኢትዮጵያ ቋንቋዎች ጥናትና ምርምር ማዕከል ያሳተመው መዝገበ ቃላት በበኩሉ፣ “ከአለፈው እስካሁን ያለው ወደፊትም የሚመጣው ሰኮንድ፣ ደቂቃ፣ ሰዓት፣ ቀን፣ ሳምንት፣ ወር፣ ዓመት…” የሚል ትርጉም ይሰጠዋል ለቃሉ፡፡

ጊዜ ኩነቶችን (ክስተቶችን) ለመደርደር፣ ቆይታቸውን ለማነጻጻር፣ በመካከላቸውም ያለፈውን ቆይታ ለመወሰን በተረፈም የነገሮችን እንቅስቃሴ መጠን ለመለካት የሚያገለግል ነገር እንደሆነም ድርሳናት ያትታሉ።

አቢሲኒካ መዝገበ ቃላት ቤት የሚለውን ቃል ሲተነትነው፤ “ናሱ ግንቡ ግድግዳው በጠርብ በዕንጨት በደንጊያ በጡብ በክፍል በክፍል የሚሠራ መኖሪያ ቤት መቀመጫ በዐለም በደስታ በመከራ በኀዘን የሚኖሩበት ቤት ወይም ከቀን ሐሩር ከሌሊት ቍር የሚከለክሉበት የሚጠለሉበት” ይለዋል፡፡

“ጊዜ ቤት” የሚለውን ስንሰማ ብዙዎቻችን ፈጥኖ ወደ አእምሯችን የሚመጣው የማብዣ ሰንጠረዥ ነው፡፡

“ጊዜ ቤት” በተማሪነት ዘመናችን ቁጥሮችን ከለየንና መደመርና መቀነስ የተሰኙትን መደበኛ የሒሳብ ስሌቶች ካወቅን በኋላ ለሚገጥመን ማባዛት የተባለ ፈታኝ ስሌት ራሳችንን የምናለማምድበት ብልሃት ነው፡፡ ልጅ ሳለን በየደብተሮቻችን ጀርባ የማናጣው የማስያ መላ፣ ስናድግ ደግሞ አይረሴ ትዝታችን ነው - “ጊዜ ቤት”፡፡

“ጊዜ ቤት” አሁን ደግሞ የእኛ ስም ነው፡፡

እስከ ቅርብ ጊዜ ድረስ ስንጠራበት ከቆየነው “ጊዜ ባር እና ሬስቶራንት” የሚል ስያሜያችንን ይልቅ፣ ለግብራችንም ለልካችንም ይመጥናል ብለን በማመን ነው “ጊዜ ቤት” መጠሪያችን ይሆን ዘንድ የመረጥነው፡፡

ሰው የሚያርፍበትና የሚሰራበት፣ ያለፈውን ዘመን ትዝታ በሙዚቃና ጥንታዊ ቅርሶች ዘወር ብሎ የሚቃኝበት፤ አሁኑን በሚገባ የሚያጣጥምበት፤ በሙሉ መስተንግዶና እንክብካቤ የወደፊት ጣፋጭ ትዝታውን የሚወጥንበት፣ የነገሮችን ሂደት በቅጡ ደርድሮ የሚለይበትና የሚያነጻጽርበት፣ በደስታ በመከራ በኀዘን የሚኖርበት ወይም ከቀን ሐሩር ከሌሊት ቍር የሚከለክልበት የሚጠለልበት ቤት ነው - “ጊዜ ቤት”፡፡

“ጊዜ ቤት” የሆነ ጊዜ ጎራ ብለው በልተው ጠጥተው ተዝናንተው የሚወጡበት ባርና ሬስቶራንት ብቻ አይደለም - የማይጠፉበት የሰርክ ቤት እንጂ፡፡ እንደራስ ጎጆ የሚናፍቁት፣ ደጋግመው የሚጎበኙት፣ እህል ውሃው የራስ ማጀት እንዳፈራው የሚጣፍጥበት፣ መስተንግዶው እንደራስ ሳሎን ፍቅርና አክብሮት የተሞላበት፣ ለራስ የሚኮሩበት ለእንግዳ የማያፍሩበት ቤት ነው - “ጊዜ ቤት”፡፡

ሲፈልጉ ማረፊያ ሲፈልጉ መዝናኛ፣ ቢስተናገዱ የሚከበሩበት፣ ቢጋብዙ የማያፍሩበት የራስ እልፍኝ፤ እናም ደግሞ እንደ ተማሪነት ዘመን በመላ እውቀት የሚቀስሙበት፣ የሚማሩበት፣ ምቹ ገበታም ጭምር ነው - “ጊዜ ቤት”፡፡

በክብር ተቀብለን የምናስተናግዳቸውን እንግዶቻችንን “ደንበኞቻችን” ከማለት ይልቅ “ቤተኞቻችን” ብለን ስንጠራቸው ነው የሚገባቸውን ክብር እንደሰጠናቸው የሚሰማን፡፡

“ደንበኛ ንጉሥ ነው!” አንልም እኛ፤ “ቤተኛ ንጉሥ ነው!” እንጂ፡፡